Comezan as obras de eliminación de verteduras ó río Limia
Con esta actuación rematarase o saneamento de Xinzo
O Concello de Xinzo de Limia, en colaboración coa Confederación Hidrográfica do Miño-Sil (CHMS), complácese en informar sobre o significativo avance nas obras de eliminación de verteduras ao río Limia no noso concello. Deuse testimonio nunha visita a Xinzo de Limia de José Antonio Quiroga, presidente da CHMS, que estivo acompañado do alcalde Amador Díaz e do resto da corporación municipal.
As obras, que supoñen unha inversión próxima ao millón de euros,
teñen como obxectivo recoller as verteduras de diversas áreas críticas,
incluíndo o antigo matadoiro, a estrada de Baltar e a Avenida de Portugal, así
como as edificacións da marxe esquerda do río, piscinas municipais, pavillón e
outras instalacións deportivas. Estas verteduras serán tratadas na Estación
Depuradora de Augas Residuais (EDAR) municipal, contribuíndo así a mellorar a calidade da auga e protexer o noso
entorno natural.
O alcalde de Xinzo de Limia, Amador Díaz, destacou a importancia destas obras para a comunidade:
"Estas actuacións son fundamentais
para preservar a saúde do noso río Limia e garantir un entorno máis limpo e
seguro para todos os nosos veciños. Agradecemos a colaboración da CHMS
neste importante proxecto e instámolos a seguir explorando novas vías de
traballo conxuntas".
O proxecto inclúe a construción
dun colector na marxe esquerda do río Limia, así como a instalación dunha estación de bombeo
para dirixir as augas residuais cara á rede municipal de saneamento e,
posteriormente, á EDAR de Xinzo de Limia.
A pesar de que estas obras estaban inicialmente
programadas para novembro de 2023, o seu inicio tivo que pospoñerse debido ás
intensas choivas que afectaron á zona. Esta decisión tomouse co fin de garantir a seguridade e a eficacia dos
traballos.
Desde o Concello de Xinzo de Limia, agradecemos
a colaboración institucional e o compromiso de todas as partes implicadas neste
importante proxecto. Continuaremos
traballando conxuntamente para preservar o medio ambiente e mellorar a calidade
de vida no noso Concello.