Mesa redonda sobre a masificación dos Entroido con escasa participación

 O pasado sábado 25 de maio, ás 19:00 horas, o Museo Galego do Entroido en Xinzo de Limia foi o escenario dunha mesa redonda, onde se debateu sobre a problemática da masificación no Entroido galego. Aínda que inicialmente estaba previsto que asistise o Entroido de Salcedo, finalmente participaron representantes do Entroido da parroquia de Sande, Cartelle, xunto cos de Xinzo de Limia e Viana do Bolo.

A mesa redonda puxo de manifesto que a situación de cada Entroido é única e persoal, o que fai que non se poidan comparar directamente entre eles. O Entroido foi identificado como un motor económico fundamental para as zonas rurais despoboadas, pero sen unha correcta xestión existe o risco de "morrer de fama" ou que as aldeas non sexan capaces de absorber o volume de xente que atraen.

Outro dos temas discutidos foi a pertinencia de Entroidos que visitan outros Entroidos. Descontextualizar o rito e aos oficiantes ao sacalos do seu entorno natural foi visto como un erro, concluíndose que nunca se debería facer durante o ciclo de Entroido.

O distintivo de Ben de Interese Cultural (BIC) tamén xerou controversia. Algúns participantes crían que só serviría para desvirtuar a tradición, incrementando a masificación de forma máis rápida, mentres que outros víano como unha oportunidade para protexer os Entroidos fronte a plaxios e apropiacións indebidas.

O debate sobre a viabilidade dun Entroido sen visitantes foi intenso. Nas grandes vilas, parece posible manter a tradición, pero nas pequenas aldeas, onde o despoboamento e a falta de relevo xeracional son críticos, parece difícil que poida sobrevivir.

Tamén se abordou se a tradición debe adaptarse ao avance da sociedade ou se permitir cambios sen restricións implica renderse ao turismo, pondo en risco o rito tradicional.

A mesa redonda abriu moitos temas de debate sen pretender pechalos, senón poñer sobre a mesa cuestións que preocupan a moitos entroideiros e entroideiras.

Ao remate da charla, o público gozou dun concerto do dúo arxentino Perrito Piloto, no marco do Tangaraño, organizado por Rochi Novoa.