Supervisión da ponte que conecta Muiños con Lobios na Conchas

O presidente da Deputación de Ourense, Luis Menor, visitou esta mañá o concello de Muíños para coñecer, acompañado polo alcalde, Plácido Álvarez, algúns dos proxectos que executa o goberno local coa financiación da institución provincial a través do Plan CooperOU e doutras axudas concedidas a este concello.

Ao remate do mandato no marco do plan provincial de financiamento, Muíños terá recibido máis de 821.000 euros para cooperación en obras e servizos, aos que se sumarán outras achegas, ata agora por un importe próximo a 150.000 euros.

Acompañado tamén por membros da corporación municipal e logo de asinar no libro de honra do Concello, Luis Menor desprazouse á estrada provincial que conecta Muíños co veciño concello de Lobios. Unha vía onde ademais de diversos traballos de acondicionamento nos accesos aos núcleos de poboación que atravesa, tamén se está a construír unha nova ponte para repoñer o paso anterior que se derrubara.

“Unha obra moi importe polo tráfico que rexistra na conexión de Muíños con Lobios e a fronteira portuguesa”, sinalou o presidente da Deputación, que cualificou o proxecto -a estrada máis a ponte- como “un dos investimentos máis elevados que ten realizado a Deputación en estradas” e que valorou en preto de 400.000 euros.

Ademais de visitar a nova que acollerá os vehículos e material do Grupo de Emerxencia Supramunicipal (GES), a estadía en Muíños incluíu un percorrido polo complexo medioambiental da Baixa Limia, situado nas proximidades de Mugueimes, a capitalidade do concello, “que constitúe todo un exemplo dos servizos que se prestan desde a área de Medio Ambiente da Deputación”, destacou Luis Menor.

Este espazo acolle unha planta de transferencia de residuos, a cuxo lado sitúase un punto limpo e unha das catro canceiras que ten a institución provincial espalladas por territorio ourensán, ademais dunha nave para os servizos da Deputación.