O subdelegado do Goberno visita Vilar de Barrio
Eladio Santos coñeceu de primeira man os proxectos de futuro do concello, así como as principais necesidades que lle expuxo o rexedor municipal
O subdelegado do Goberno en Ourense, Eladio Santos, realizou esta mañá unha visita de carácter institucional ao Concello de Vilar de Barrio, onde se reuniu co alcalde do municipio, Manuel Conde, para abordar as preocupacións e necesidades deste concello do rural, coñecer a situación actual do mesmo e os proxectos estratéxicos para o futuro.
Subdelegado e rexedor fixeron un repaso polas inversións que o Goberno do Estado está a destinar a Vilar de Barrio, como son os máis de 650.000 euros dedicados ao proxecto de renovación de infraestruturas de saneamento e depuración do núcleo de Arnuide, co obxectivo de afrontar “un problema recorrente en Vilar de Barrio dende anos atrás”, explicou Eladio Santos.
Na reunión tamén comentaron as obras de mellora en eficiencia enerxética e iluminación que se levarán a cabo, cunha achega estatal de 73.450 euros, na procura da redución do consumo e de xerar aforro para as contas municipais; así como a financiación específica dentro do Pacto de Estado contra a Violencia de Xénero coa que conta Vilar de Barrio.
No tocante a servizos sociais, o alcalde trasladoulle as dificultades que afrontan para ofrecer, por exemplo, axuda no fogar. “Os pequenos concellos coma este teñen que prestar moitos servizos que non son capaces de financiar, como é o servizo de axuda no fogar, en relación ao cal, en moitos casos, o Goberno autonómico non está cumprindo coa súa función”, reclamou o subdelegado.
Ademais, afondaron nun proxecto que está en marcha no municipio, incluído nun programa do Ministerio de Transición Ecolóxica e financiado con fondos Next Generation, co que se pretende dinamizar o rural a través da xestión turística e de recursos forestais e gandeiros; o cal se atopa en proceso de análise para cumprir os criterios precisos para a concesión da correspondente axuda.
Nesta mesma liña, tamén comentaron a importancia da agricultura e a gandaría extensiva. “Vilar de Barrio está moi en contacto con áreas do Macizo Central de Maceda e Montederramo, e comparte con elas este tipo de explotacións gandeiras para a carne; ao tempo que comparte ca Limia a súa tradición pataqueira”, destacou Santos. De feito, Manuel Conde aproveitou a ocasión para convidar ao subdelegado á próxima Festa de exaltación da pataca, que se celebrará os días 12 e 13 de outubro.