Xinzo de Limia celebra un Nadal cheo de actividades para todas as idades
- A programación inclúe galas, exposicións, e unha votación popular sobre a fonte da Praza Maior
- Concertos como o de Guadi Galego, Rubén Simeó, Musical dos Anos 80-90’s e Vaiana destacan na oferta deste Nadal
- Os vales de desconto de Prolimia estarán dispoñibles a partir deste venres
O Concello de Xinzo de Limia presentou esta maña a programación de Nadal 2024, que se desenvolverá entre o 13 de decembro e o 6 de xaneiro. Todas as actividades deste Nadal serán de balde, garantindo o acceso universal á cultura e ao lecer. Este ano, a programación incorpora unha forte compoñente solidaria, especialmente co apoio ao CEIP Ausias March de Paiporta, unha zona afectada recentemente pola DINA..
Nos catro grandes eventos musicais desta programación (Guadi Galego, Ruben Simeó, Musical dos 80-90’s e Vaiana), habilitarase unha fila 0 para que todas as persoas asistentes poidan colaborar con donativos destinados a este centro educativo valenciano. A recadación realizarase en colaboración co CEIP Rosalía de Castro de Xinzo de Limia e a súa ANPA, fomentando así unha cadea de solidariedade entre comunidades.
A oferta de Nadal inclúe concertos, galas, exposicións, e actividades tradicionais como a visita do Pai Noel e a Agrocabalgata, as Pre-badaladas e a Cabalgata dos Reis Magos. Tamén se poderá gozar da exposición fotográfica de Noelia Caseiro na Rúa dos Viños, desde o 13 de decembro en diante.
Para facilitar a conciliación familiar durante as vacacións escolares, o Concello organiza o programa “Concilia Nadal”, dirixido a nenas e nenos de 4 a 10 anos, no Pazo de Deportes. Ademais, as familias poderán inscribir aos máis pequenos no “Christmas Camp”, un campamento en inglés que combina aprendizaxe e diversión, ofrecendo unha experiencia enriquecedora durante o Nadal. Pensando en tódolos públicos, desenvolverase o programa “Nadal nos Pobos” e o parque de atraccións Limialandia no Pazo de Deportes..
As novas propostas decorativas de Nadal deste ano están a captar a atención de todas e todos, destacando a recreación da antiga fonte da Praza Maior. Debido ao éxito desta iniciativa, o Concello abrirá unha votación nas súas páxinas oficiais para que todas as veciñas e veciños censados en Xinzo poidan decidir se desexan que esta fonte se instale de forma permanente.
