​PANTALLAS

Fermosas, elegantes,  fabulosas,

argallan “sufaldreos” ancestrais;

Bailando con acenos rituais,

saíron as PANTALLAS, numerosas.

Batendo as súas vexigas fachendosas

e ao son das campaíñas sensuais,

amosan polo pobo as credenciais:

“Nós somos as “raíñas” poderosas!”

Ollade! Xa agarraron a un veciño

por non levar disfrace. Que ousadía!

Xa o levan a pagar na tasca un viño.

Mestura de agarimo e enerxía:

de Xinzo recibides seu cariño.

Vós sodes, do Entroido, a melodía.

Alfonso Carlos Lois