Máis de 40 festas históricas de toda España reúnense esta fin de semana en Xinzo.

Todo está listo en Xinzo de Limia para acoller, esta fin de semana, a Asemblea Anual da Asociación Española de Festas e Recreacións Históricas (AEFRH), un evento que reunirá na vila a representantes de case medio cento de festas históricas de toda España.

A organización corre a cargo da A.C. Civitas Limicorum e da propia AEFRH, coa colaboración do Concello de Xinzo de Limia e da Xunta de Galicia, a través de Turismo de Galicia.

Con esta asemblea, Xinzo recolle o testigo da cidade andaluza de Linares, que acolleu o encontro nacional en 2024, e deixará a testemuña para o vindeiro ano, na cidade de Lugo, reforzando así o papel de Galicia como referencia estatal no mundo da recreación histórica. A data fíxose coincidir co 25º aniversario da A.C. Civitas Limicorum e tamén da AEFRH.

Ao longo da fin de semana desenvolveranse reunións internas, visitas culturais e actividades de convivencia entre persoas que representan todas as épocas da historia. Unha verdadeira celebración da diversidade, da memoria compartida e do traballo que se realiza en moitas vilas e cidades do país para recuperar e poñer en valor o seu pasado.

Un dos momentos máis agardados será o gran desfile de recreación histórica, que terá lugar o sábado 10 de maio ás 20:00 horas, con saída desde o MUGAE (Museo Galego do Entroido) e chegada á estación de autobuses. Participarán nel máis de 200 persoas ataviadas con vestimentas de distintas épocas, nun percorrido que amosará a riqueza e diversidade das festas históricas de todo o Estado.

Xinzo de Limia converterase así no gran escenario da historia vivida, nunha fin de semana na que os hoteis da comarca colgan o cartel de completo, e na que se espera unha importante repercusión cultural, turística e institucional.