Xinzo de Limia celebrará o Día das Letras Galegas cunha homenaxe ás pandereteiras e cantareiras galegas
Primeiro haberá unha proxección audiovisual conmemorativa, para continuar cun concerto colectivo de pandereteiras.
O Concello de Xinzo de Limia celebrará o Día das Letras Galegas o vindeiro venres 16 de maio ás 20:00 h cun acto especial no Auditorio da Casa da Cultura, centrado na poesía popular oral galega e nas mulleres que a conservaron e transmitiron ao longo das xeracións.
A cita comezará coa proxección dun audiovisual conmemorativo, que afondará no valor desta data para a cultura galega. A continuación, farase un percorrido pola tradición oral que vive nos fiadeiros, feiras e festas grazas ás cantareiras e pandereteiras do país.
O evento culminará cun concerto colectivo no que seis grupos locais renderán homenaxe a todas esas mulleres que gardaron e espallaron a nosa poesía oral a través da música:
- Grupos de Pandereteiras 2 e 3 da Escola de Gaitas de Xinzo
- As Bruxas
- Cantaralai
- As Xingras da Arca
- Cantareiras da Limia