Máis de 750 escolares únense en Xinzo para celebrar o XIII Abrazo ao río Limia
Os cativos e cativas disfrutaron un ano mais do abrazo, unha actividade onde se fomenta a irmandade.
Xinzo de Limia acolleu esta mañá unha nova edición do tradicional “Abrazo ao río Limia”, un acto simbólico de irmandade que celebra xa trece edicións e que reafirma os lazos entre as vilas de Xinzo de Limia e Ponte de Lima.
A actividade, promovida no marco do histórico irmandamento entre ambos municipios, reuniu nesta ocasión a máis de 750 nenas e nenos dos centros educativos de Xinzo e da vila portuguesa. O evento serviu unha vez máis como espazo de convivencia, memoria compartida e respecto pola natureza.
A xornada comezou cunha calorosa benvida, á que se sumou a música da Banda de Gaitas de Xinzo, e culminou co simbólico abrazo humano ao río Limia, unha xesta que reafirma a conexión emocional e cultural co territorio e coa súa contorna fluvial. Ademais, realizouse a plantación dunha nova árbore como xesto de compromiso co medio ambiente e co futuro das novas xeracións.
Este encontro ten lugar pouco despois da visita dos escolares de Xinzo á vila irmá de Ponte de Lima no mes de maio, reforzando así unha alianza que continúa a medrar ano tras ano, e que se converte nun exemplo de cooperación entre territorios unidos pola historia, a cultura e o río.
