Críticas polo estado das instalacións do complexo da piscina cuberta

 As persoas usuarias da piscina climatizada de Xinzo de Limia rexistraron un escrito no Concello esixindo que a concelleira de deportes escoite as queixas que veñen manifestando nos últimos meses.

Presentouse unha reclamación acompañada de numerosas firmas (máis de 60) de apoio para convidar á edila de deportes a visitar as instalacións e comezar a poñer solución ás graves deficiencias que afectan a aspectos como a hixiene, intimidade, comodidade e equipamento, o que redunda nun aproveitamento deficiente dunhas instalacións deportivas públicas.

O escrito recolle a vontade das persoas usuarias a subir a taxa polo uso do recinto se iso significa unha mellora substancial na dotación e mantemento tanto da área de baño coma a de ximnasio e os correspondentes vestiarios.

Escrito presentado no concello esta mesma mañá 

Tamén se recolle o desexo de que os horarios do verán permitan o exercicio en condicións similares ás do resto do ano e non obriguen á xente e interromper as súas rutinas ou ter que acudir a outros concellos para manter a actividade física, prescrita por médicos e médicas en moitos casos.