O pobo de Fiestras e Laroá en pe de “guerra” democrática

 Cando pensabamos que coa protesta a prol do servizo pediátrico de Xinzo de Limia rematabamos outro ano nefasto para o rural, chega a nós outra inquietante nova: a eliminación das mesas electorais de Laroá e Parada de Ribeira.  A polémica decisión parte do Concello de Xinzo de Limia excusándose na Lei Orgánica 5/1985 do Réxime Electoral Xeral que establece as 200 persoas como mínimo para conformar as mesas electorais. 

As veciñas e veciños de Fiestras e Laroá xuntáronse este sábado en resposta a esta mala nova para manifestar o rexeitamento absoluto a esta decisión e organizar próximas accións. Resulta preocupante que a maioría de persoas de maior idade expresaran rotundamente a súa intención de non ir votar se non poden facelo no lugar de sempre. Cómpre sinalar que historicamente na mesa de Laroá votaban as electoras e electores de San Pedro, Laroá, Fiestras e Seoane de Oleiros, e nas últimas convocatorias desprazaron á xente de Seoane á mesa de Faramontaos, prexudicándolle isto á de Laroá. 

Consideramos unha aberración suprimir calquera mesa rural porque supón unha perda do dereito básico de toda persoa a exercer o voto con garantías, e, a maiores, dóenos especialmente que se suprima a mesa de Laroá polo esforzo que se leva facendo tantos anos para dinamizar as dúas aldeas da parroquia: festas comunitarias, limpeza dos camiños pola veciñanza e outros traballos comunitarios, reparación dos locais sociais con medios propios, vermú autoxestionado os domingos, actividades propias e tres asociacións activas.

O máis grave é a declaración de intencións do grupo de goberno con esta decisión: nin sequera se dirixiu á veciñanza para informala e tentar buscar solucións. A perda da mesa electoral de Laroá vai supoñer ademais unha diminución do censo do propio Concello de Xinzo de Limia, xa que moitas persoas seguen empadroadas na súa aldea de procedencia por un vencello afectivo, que deste xeito se vai perder.

Comezamos con esta acción simbólica no propio local electoral de Laroá para visibilizar o enfado colectivo que orixinou este decisión e comezamos a planificación das futuras actuacións ás que convidamos tamén ás veciñas e veciños de Parada de Ribeira, para sermos tidos en conta polo alcalde e grupo de goberno do Concello de Xinzo de Limia, de quen esperamos unha defensa firme dos dereitos e dignidade das persoas do medio rural.